martes, 15 de octubre de 2019

"Por un monte galego con futuro"

A Mancomunidade de Montes Veciñais e Man Común do Morrazo apoia a manifestación do 20 outubro de 2019 "Por un monte galego con futuro". Adxuntamos a nota de prensa enviada aos medios de comunicación.



jueves, 10 de octubre de 2019

Actuacións en Outeiro Balea e Madalena

 
Neste comezo do mes de outubro a Comunidade de Montes de Darbo en colaboración co concello de Cangas está realizando unhas actuacións de restauración de infraestruturas para uso público no tramo baixo do río Pontillón no lugar de Outeiro Balea.


Instalouse unha varanda de madeira para protexer o noiro entre o camiño de acceso á costa de Outeiro Balea e o val fluvial do Pontillón, esta varanda ten continuidade sobre a ponte e a rúa das Barreiras.

Aproveitouse tamén para realizar unha roza no terreo Comunal para facilitar o desfrute da zona polos veciños. 


Na serra da Madalena comezaron os traballos de roza na faixa paralela ao camiño de ascenso á Mesa de Montes (ver fotografía de encabezamento).

A Xunta Reitora.

martes, 1 de octubre de 2019

Chega o outono ao monte de Darbo


Rematou o verán e unha nova estación comeza, o outono ven cargado de transformacións nos bosques de Darbo, as cores verdes deixan paso a cores ocres, castañas e laranxas. Tamén no monte aparecen os froitos de castiñeiros e fungos que atraen tódolos anos a centos de persoas para recoller estes manxares da natureza. 

Para un aproveitamento racional destes recursos, gratuitos e de libre recolllida para os veciños de Darbo, é importante seguir as seguintes indicacións:

Souto de A Pedra Cabalgada. Setembro 2019.

Para a recollida de castañas: 

1) Só recoller as castañas que están no chan. 

2) NUNCA varear as ramas dos castiñeiros. O monte de Darbo está afectado polo fungo que produce o Chancro (ver enlace), unha enfermidade grave que penetra polas feridas producidas na cortiza do castiñeiro. 

3) NON ACAPARAR, recolle e leva só a cantidade xusta para satisfacer as túas necesidades. Moitas persoas virán o souto tras a túa visita e gustarán de atopar castañas para degustar. 

4) Lembra deixar castañas para os animais do bosque. Eles tamén teñen que comer e o inverno é unha época de escaseza. 

Gymnopilus spectabilis na Pedra Cabalgada. Novembro 2008.

Para a recollida de cogomelos: 

1) Non tódolos cogomelos son comestibles. Observa, fotografía, utiliza guías de identificación, ante calquer dúbida, non recolectes e así evitarás a tentación de consumilas. 

2) Tanto na fase de localización como na de recolla de cogomelos non se empregarán máis instrumentos para a extracción que un coitelo ou navalla. Os cogomelos extraeranse coidadosamente coa punta da navalla ou coitelo desde a base do pé, de xeito que queden enteiros, e tendo perfectamente visibles todos os caracteres que permitan a súa correcta identificación sen danar o micelio. Unha vez extraídos reporase a terra ou a folla de xeito que o terreo quede nas condicións orixinais (DECRETO 50/2014, do 10 de abril) 

3) Deixaranse intactos os exemplares que non se vaian recoller (non arrancar, nin pisar). 

4) Os recipientes utilizados para o traslado e almacenaxe dos cogomelos terán que ser cestos ou recipientes de material permeable de semellante natureza, abertos pola súa cara superior, que permitan a súa aireación e a caída ao exterior das esporas. (DECRETO 50/2014, do 10 de abril) 

5) NON ACAPARAR. A normativa galega establece un máximo de 2 quilogramos de cogomelos por persoa e día. E só para consumo propio, NUNCA para a venda a terceiros. 

6) Quedan prohibidas segundo a normativa (polo que poden ser denunciables), as seguintes actuacións: 
  • Remexer o chan, tanto na fase de localización como na de recolla, de xeito que se altere ou prexudique a cobertoira vexetal superficial.
  • Usar anciños, angazos, aixadas ou calquera outra ferramenta que altere o cogomelo.
  • Recoller cogomelos e fungos pola noite.
  • Romper ou deteriorar calquera exemplar que non sexa obxecto de recolección.
  • Recoller cogomelos “novos” ou demasido “vellos”.
  • Recoller, alterar ou estragar exemplares de especies protexidas.
  • Trasladar e almacenar os cogomelos en bolsas de plástico ou similares.
A Xunta Reitora.

jueves, 27 de junio de 2019

Traballos de roza no Monte Comunal

Neste mes de xuño procedemos a realizar traballos de roza de herba e matogueira. A meirande parte do monte no que se actuou foi mediante unha rozadura por trituración con tractor. En menor medida, nas zonas de terreo inclinado ou pedregoso a roza foi manual.
Sendeiro entre Xestoso e Laxe da Chan.
Coma anos anteriores os traballos centráronse en camiños e sendeiros, zonas de lecer e lindes con vivendas. Realizouse de forma selectiva, respectando pés a conservar das especies frondosas autóctonas. O Arboreto da Raposa en Varalonga, Laxe da Chan, San Roque, Ourelo e Monte Carrasco son algunhas das zonas onde se realizaron as actividades.

Monte Carrasco.
As operacións silvícolas son importantes ferramentas para evitar a propagación de lumes forestais, a roza de matogueira permite establecer unha discontinuidade na vexetación que dificulta a evolución dos lumes. Tamén os medios de extinción utilizan estas faixas para loitar contra as lapas.

Sendeiro en San Roque.
As rozas de vexetación teñen un impacto positivo e negativo sobre o medio natural; Positivo porque  ao eliminar a vexetación arbustiva aparecen novos espazos ocupados por herbas e outras prantas anuais de alto valor biolóxico e os animais asociados. O impacto negativo ten lugar cando a intensidade da roza e tan alta que afecta ao chan (erosión), ou a época de realización dos traballos non é a adecuada, por exemplo, coincidindo coa nidificación das aves (destrución dos niños). Por estes motivos é importante non realizar rozas a feito nin en superficies amplas e planificar as actuacións en épocas adecuadas.

miércoles, 19 de junio de 2019

Retirada de refugallos de Outeiro Balea

O pasado sábado 15 de xuño procedemos á limpeza do lixo acumulado na zona de Outeiro Balea. Tralo lume que afectou á zona o pasado 26 de maio quedaron á vista numerosos restos de refugallos que ao longo dos anos persoas incívicas verteron neste espazo de alto valor paisaxístico.

Dende o Outeiro de Balea podemos observar gran parte da ría de Vigo, as illas Cíes e toda a fachada da costa sur da Ría (Vigo, Nigrán e Baiona). Unha vista que non merece estar contaminada polo lixo de xente que non valora o patrimonio dos veciñ@s da parroquia de Darbo.

Nesta xornada de traballo retiramos do medio varias tixolas, cazos, pratos, cafeteira e unha bicicleta. Botellas de vidro, latas... Ata un inodoro apareceu no monte.

Posteriormente ao traballo de recollida os restos foron trasladados ao Punto Limpo.

lunes, 17 de junio de 2019

Corta de eucaliptos na costa de As Barreiras - Santa Marta


Procedemos á tala dos eucaliptos nunha das parcelas propiedade da Comunidade de Montes de Darbo en As Barreiras - Santa Marta. A zona de actuación estará integrada no futuro Espazo Natural de Interese Local de “Punta Balea – As Barreiras” que está pendente de aprobación en comisión do goberno do concello de Cangas.

Dende a Comunidade de Montes de Darbo traballamos por preservar, manter e mellorar a calidade dos recursos e dos equilibrios naturais, así como velar polo seu futuro. Por este motivo a presenza de eucaliptos neste espazo de alto valor ambiental era incompatible coa súa conservación. Tralo apeo das árbores procederase ao seu tratamento con herbicida localizado sobre a zona de corte para evitar o rebrote.


jueves, 13 de junio de 2019

Lume no Outeiro de Balea e actividade de limpeza por parte da Xunta Reitora


Volvemos ser vítimas doutro lume na zona de Outeiro de Balea (Darbo, Cangas), zona con recurrentes episodios de lumes provocados pola man do home. A zona estaba dominada por toxeiras, formacións vexetais de importancia capital. En contra do que se pensa debido á súa omnipresencia no noso país e sobre todo nas áreas costeiras, estas formacións son moi escasas e restrinxidas a nivel europeo. De feito, están protexidas na Directiva 92/43/CEE da Unión Europea figurando como “hábitats de interese comunitario”. Isto quere dicir que a administración europea considéraos, despois de valorar todos os hábitats presentes no territorio comunitario, como un hábitat ameazado e que debe estar protexido mediante a creación de espazos naturais que conteñan estas comunidades. Un bo exemplo, que motivou a declaración da “Costa da Vela” como integrante da Rede Natura 2000 foron as súas toxeiras-uceiras e non a súa espectacular paisaxe (como adoita pensarse). Ó seu importantísimo valor biolóxico e como patrimonio natural engádeselle a función ecolóxica, xa que estas matogueiras son as responsables de substituir o bosque natural cando este é degradado, e de facilitar a súa recuperación enriquecendo o chan, creando solo e substrato e favorecendo paseniñamente a colonización do bosque. A recurrencia dos lumes provoca o empobrecemento do chan ou a súa total perda, co lume tamén perdemos a nosa paixase, o noso patrimonio natural.

Por favor, neste verán se observades lume, chamar aos teléfonos de emerxencia seguintes:
  • Axencia Galega de Emerxencias. Teléfono: 112
  • Incendios forestais. Teléfono: 085
Costa de Balea dende punta Corveiro. Ano 2015.

Os membros da Xunta Reitora visitaremos a zona queimada o próximo sábado 15 de xuño, pola mañá sobre as 11.30 horas para proceder á limpeza dos refugallos que o lume deixou á vista.

miércoles, 29 de mayo de 2019

Convocatoria de Asamblea Xeral Ordinaria da CMVMC de Darbo

Convocamos aos comuneiros á ASEMBLEA XERAL de carácter ordinario da Comunidade de Montes Veciñais en Man Común de Darbo que terá lugar o vindeiro SÁBADO 01 de XUÑO de 2019 no Colexio Público de San Roque ás 15.00 en primeira convocatoria e ás 17:00 en SEGUNDA CONVOCATORIA

A Asemblea terá a seguinte orde do día: 

1. Lectura e aprobación da acta da anterior asemblea, se procede.
2. Altas e baixas no censo de comuneiros.
3. Informe económico do ano 2018 e aprobación de contas.
4. Informe de xestión do ano 2018.
5. Temas xurídicos e permutas.
6. Preguntas e propostas.

Solicitamos a vosa asistencia, xa que O MONTE COMUNAL é un dereito e un ben a preservar que nos pertence. 

Un cordial saúdo.